A iniciativa, que xa conta con once grupos constituídos, busca fomentar o uso do galego no día a día, dirixíndose tanto a persoas que non o usan habitualmente como a aquelas en proceso de adquisición da competencia oral.
A deputada de Lingua, Sol Agra, destacou que os grupos son unha ferramenta «sinxela, pero moi poderosa», para xerar contornas seguras onde «perder o medo a falar e recuperar a confianza no uso do galego, fóra de contextos formais ou académicos».
Representantes da Deputación e dinamizadores de varios grupos participaron recentemente nunha xuntanza de análise e coordinación nas instalacións da asociación xuvenil Xiradela en Arteixo. O encontro serviu para concretar propostas de acción común e intercambiar experiencias.
A rede prevé medrar nesta nova andaina, sumando máis grupos nos concellos da Coruña (con dous grupos), Arteixo, Arzúa, Betanzos, Boiro, Carballo (con dous grupos), Ferrol, Narón, Negreira e As Pontes. A Deputación tamén achega materiais, recursos e formación para os dinamizadores.
Colectivos interesados en unirse á rede poden solicitar información e contacto coa Área de Lingua da Deputación. A web do organismo provincial dispón dun formulario de inscrición e unha guía para dinamizadores.
