Baixo o lema Investigación que conecta a túa cidade, a xornada achegou a ciencia e a tecnoloxía á sociedade de forma práctica e participativa, con máis de 35 investigadores e investigadoras do CINTECX implicados. Por primeira vez, a iniciativa saíu das instalacións da universidade para celebrarse no Tinglado do Porto.
Durante a mañá, preto de 250 estudantes de oito centros educativos de Vigo, A Guarda e Santiago de Compostela participaron nunha búsqueda do tesouro científica. Tiveron que superar actividades e experimentos relacionados coa investigación do centro, descubrindo aplicacións do xeorradar, intelixencia artificial, realidade mixta, tecnoloxías espaciais, baterías e almacenamento de enerxía, entre outras propostas.
Na sesión de tarde, máis de 445 persoas achegáronse á ciencia de forma libre. O público puido experimentar con impresión 3D, realidade virtual, o videoxogo Alerta Verde: Salva o teu centro, aprender a identificar noticias falsas con Kill the Bulo e coñecer as propiedades dos materiais. Tamén se incluíron pases do show científico de Ceo Aberto.
Este récord de participación consolida a Xornada de Ciencia Aberta como unha das principais iniciativas de divulgación do CINTECX e reforza a súa aposta por achegar á sociedade a investigación desenvolvida nas súas áreas tecnolóxicas. A iniciativa conta co financiamento da Xunta de Galicia e dos fondos europeos FEDER.
