O deportista da Escola Xadrez Pontevedra-Universidade de Vigo, David Fernández Lago, obtivo a medalla de prata no XXXV Campionato de España Individual Absoluto da Federación Española de Deportes para Cegos (FEDC). A competición tivo lugar na localidade andaluza de Bailén e reuniu a 52 xadrecistas.
Fernández Lago sumou catro vitorias e catro táboas, acadando un total de seis puntos. Quedou a medio punto do campión, o xadrecista catalán Gavril Draghici, mentres que Roberto Clemente completou o podio co bronce.
O integrante do primeiro equipo do club universitario tivo un inicio forte no torneo, con dúas vitorias fronte a xogadores da federación madrileña e unha táboa fronte ao canario Valeriano Septien. Tras vencer ao andaluz Pedro José Rubio, asinou táboas con Draghici. Unha cuarta vitoria ante o vasco Óscar Sáez e un empate na penúltima xornada permitíronlle chegar á última rolda con opcións ao título.
Ambos completaron con táboas o seu último taboleiro, o que converteu o representante da federación catalá en campión de España, obtendo Fernández Lago a prata e Clemente o bronce.
Esta medalla de prata súmase ao palmarés de Fernández Lago, que inclúe dous títulos de campión de España absoluto da FEDC (2023 e 2024) e unha medalla de bronce en 2025, ano no que tamén foi subcampión de España de xadrez rápido.
