Os traballos buscan mellorar o estado do firme e reforzar a seguridade viaria nesta vía de titularidade municipal, que actualmente presenta un mal estado e carece de sinalización horizontal. O proxecto céntrase na mellora e repavimentación da infraestrutura existente, sen modificar o trazado nin a rasante.
A actuación, financiada pola Consellería do Medio Rural ao abeiro das axudas para actuacións en camiños rurais 2026-2027, tamén prevé a execución ou adaptación da sinalización viaria para contribuír a unha circulación máis segura.
O alcalde de Soutomaior, Manu Lourenzo, destacou a importancia de investir no mantemento das infraestruturas municipais, especialmente nas parroquias rurais, para mellorar a accesibilidade e a calidade de vida da veciñanza.
Esta intervención en Muradella forma parte dun programa máis amplo de mellora das vías rurais promovido polo Concello, que tamén inclúe o proxecto de mellora e repavimentación do camiño do Valadoiro, en Moreira.
