O Concello do Porriño continúa coas obras de pavimentación e mellora da seguridade viaria en diversos camiños de titularidade municipal. Entre as actuacións destaca a pavimentación do Camiño Contrasto, na parroquia de Torneiros, que xa está en execución, e a próxima intervención no Camiño da Torre, na parroquia de Atios.
O alcalde, Alejandro Lorenzo, acompañado polo concelleiro de Obras, Ramón Porto, supervisou o avance dos traballos de fresado, reasfaltado e posta a punto da sinalización vial. Estas obras buscan garantir condicións óptimas de circulación e conservación a longo prazo.
A intervención no Camiño da Torre, en Atios, ten como obxectivo principal solucionar os problemas de evacuación de augas pluviais que provocaban deterioración do firme. Renovarase a drenaxe e canalización, xunto coa reposición do pavimento.
Estas actuacións inclúense dentro do programa municipal de mellora de camiños rurais e contan co cofinanciamento do Fondo Europeo Agrícola de Desenvolvemento Rural (Feader) no marco do Plan estratéxico da PAC 2023-2027.
Súmanse a outras obras xa rematadas como as do Camiño de Coto do Muiño (na parroquia do Porriño), o Camiño da Relva (en Torneiros) e o Camiño do Regueiro (en Mosende). O conxunto dos traballos tivo un orzamento base de licitación de 125.507,87 euros.
“"Mellorar as infraestruturas das nosas parroquias é unha prioridade absoluta para garantir que todos os veciños e veciñas contan con servizos e accesos dignos. Con estas actuacións reforzamos a seguridade viaria e facilitamos a mobilidade no día a día das familias da contorna. Os traballos realizados nos camiños de Contrasto non só renovan o firme e a capa de rodaxe, senón que vertebran o territorio e melloran a calidade de vida no rural."
O alcalde destacou que estas obras no rural continuarán.
