O Concello do Porriño aposta por achegar a historia e a cultura do municipio a novos públicos coa creación desta revista sobre Historia e cultura do Porriño. O alcalde, Alejandro Lorenzo, xunto con Diego Giráldez, o coordinador da revista, e algúns dos participantes nesta nova publicación, debullou o contido do seu primeiro número nun acto celebrado no emblemático Templete de Antonio Palacios, ateigado de público.
A presentación comezou coa interpretación de “Abastos anos 90” polo poeta Samuel Merino. A revista, editada polo Concello, explora a historia e o presente do municipio, abrindo espazo a novos creadores como Antía Villaverde ou Rubén Silva, estudantes que demostran o futuro da cultura local.
O alcalde, Alejandro Lorenzo, destacou que este é só o primeiro número dunha publicación con longo futuro, xa que O Porriño está cheo de historias e creadores que precisan espazos. Lembrou tamén outras iniciativas editoriais e figuras como Pedro Ocampo, recentemente falecido, e puxo en valor o labor cultural da vila, exemplificado no templete de Antonio Palacios.
Diego Giráldez, historiador e escritor e coordinador da revista, agradeceu a aposta do Concello por un produto pensado para perdurar no tempo. 'Fenda' nace coa vontade de ser unha revista que se garda e se volve abrir anos despois, reflexionando sobre o Porriño que fomos e o que se está a construír, xa que a memoria escríbese tamén no presente.
O primeiro número inclúe unha reportaxe sobre as Festas do Cristo, a historia das salas de cine e o cinema mudo, un cómic sobre a historia do Porriño, e aborda o peto de ánimas de San Antón de Budiño, a rúa Pío XII e a relación entre Antonio Palacios e a actriz Lydia Borelli na sección “Rosa Porriño”. Tamén se destaca a tradición panadeira e o tecido industrial, con CEAMSA como empresa pioneira nos polígonos industriais.
A presenza de autores de diferentes xeracións busca conectar a memoria do Porriño coas persoas que hoxe crean e constrúen a vida cultural. A revista, deseñada por IdeArte Estudio, presenta textos accesibles e un tratamento visual contemporáneo para achegar o patrimonio e a memoria local a un público amplo, recoñecendo o que está a nacer diante dos nosos ollos.
A revista, que é gratuíta, estará dispoñible a partir deste xoves en todos os centros culturais e educativos do Porriño e promete seguir sumando colaboradores, tendendo unha ponte entre a memoria, o presente e as novas xeracións.
