A historiadora María Álvarez-Blázquez ofrecerá a conferencia ‘A transformación do Val Miñor coa chegada do ferrocarril eléctrico’ ás 19:30 horas no Auditorio Municipal. A entrada será de balde ata completar aforo.
Esta é a primeira actividade dunha programación que se estenderá ata finais de ano, grazas á colaboración das asociacións ‘Enganchados do pescante. Memoria dos tranvías de Vigo’ e Resiliencia, así como do experto Ismael Pérez-Izaguirre.
A programación continuará o xoves 12 de novembro coa proxección de ‘Tranvía a la Malvarrosa’ no Cine Municipal da Ramallosa. O 25 de novembro, o Auditorio Municipal acollerá a proxección de curtas e documentais sobre o tranvía. O 2 de decembro haberá unha conversa sobre mobilidade actual e, de Nadal a finais de xaneiro, unha exposición no Centro da Terceira Idade da Ramallosa, na antiga estación.
O alcalde, Juan González, destacou que o tranvía forma parte da memoria colectiva e patrimonial do Val Miñor, sendo a Ramallosa o núcleo neurálxico da liña. Nigrán mantén viva a antiga estación e o alcalde subliña o seu compromiso coa preservación da memoria local.
