O Concello de Mos apoia o I Torneo Solidario de Pádel iPadel & AFAGA ‘Xuntos pola memoria’, un evento deportivo e solidario que terá lugar do 15 ao 18 de outubro nas instalacións de iPadel Mos. O obxectivo principal é recadar fondos e concienciar sobre a realidade do alzhéimer.
Organizado por iPadel e AFAGA Alzhéimer, coa colaboración do Concello e outras entidades, o torneo xa abriu as inscricións. A proposta combina a práctica deportiva co apoio a unha organización dedicada a axudar a persoas con alzhéimer e as súas familias.
Na presentación participaron a directora de iPadel, Alba Pastoriza; o presidente de AFAGA Alzheimer, Juan Carlos Rodríguez; a traballadora social de Afaga, Marina Requejo; o director deportivo, Marcos Chantada; e a alcaldesa de Mos, Nidia Arévalo.
As inscricións, cun prezo de 20 euros por persoa que inclúe un welcome pack, poden realizarse a través de Padel Tour Play. As prazas son limitadas. A competición contará con categorías masculina, feminina e mixta.
Ademais, habilitouse unha fila cero para colaborar coa causa solidaria mediante Bizum. O Concello de Mos anima á veciñanza, empresas e colectivos a participar nesta primeira edición para contribuír á difusión do torneo e ao compromiso social.
Baixo o lema ‘Xuntos pola memoria’, o torneo busca converter a pista de pádel nun punto de encontro deportivo e de apoio ao labor de AFAGA.
As inscricións permanecerán abertas ata o 11 de outubro ás 12:00 horas, ou ata que se cubran as prazas dispoñibles. Máis información e inscricións en padeltourplay.com.
