O Concello de Mos acolleu o acto de clausura da terceira edición do programa Fórmate na Empresa. Esta iniciativa, impulsada pola Xunta de Galicia e xestionada pola Asociación de Empresarios de Mos (AEMOS), ten como obxectivo mellorar a empregabilidade de mozas e mozos menores de 30 anos inscritos no Sistema Nacional de Garantía Xuvenil. O itinerario combina formación especializada con prácticas en contornos laborais reais.
O evento contou coa presenza da directora xeral de Xuventude da Xunta de Galicia, Lara Meneses, da alcaldesa de Mos, Nidia Arévalo, e do presidente de AEMOS, Manuel Castro. Tamén asistiron representantes das empresas colaboradoras e dos participantes nesta edición.
Esta terceira edición pecha cun balance moi positivo, xa que 7 dos 15 participantes conseguiron atopar emprego tras finalizar o proxecto. Isto confirma a eficacia do modelo, que aúna capacitación profesional co contacto directo co tecido empresarial.
Durante os últimos meses, os participantes adquiriron competencias técnicas e transversais, ademais de coñecer a realidade laboral de sectores estratéxicos da economía galega. Isto foi posible grazas á implicación de 14 empresas colaboradoras que abriron as súas portas para acoller o alumnado en prácticas.
Os sectores representados nesta edición inclúen o metalmecánico, as Tecnoloxías da Información e Comunicación (TIC), a biotecnoloxía, o sector naval e os servizos orientados á calidade de vida e ao benestar, ámbitos con alta demanda de talento e oportunidades de emprego.
Empresas como Tecnomicra, Panelfa, WDixital, TYM Ganain, Fundación Integra, Rodicut, Folerpa, Grupo Zendal, Global Concept, Frets Vigo, Tecnomecánica Elcomp e Tormega, entre outras, contribuíron á formación práctica e á integración laboral dos participantes.
No acto de clausura realizouse un balance dos resultados e puxose en valor a colaboración entre administracións públicas e empresas como ferramenta clave para favorecer a incorporación da mocidade ao mercado laboral.
Desde AEMOS destacan a excelente resposta das empresas nas tres edicións realizadas, nas que 37 entidades acolleron a 47 mozos e mozas, dos cales 21 conseguiron inserirse laboralmente tras as prácticas.
A entidade empresarial subliña que Fórmate na Empresa se consolida como unha ferramenta eficaz para a inserción laboral xuvenil nas empresas da contorna, facilitando a transición entre formación e emprego.
Pola súa banda, o Concello de Mos reafirma o seu compromiso co impulso de iniciativas que crean oportunidades laborais, retén o talento novo e melloran a cualificación profesional da mocidade.
Os resultados desta edición consolidan o programa como un referente na conexión entre as necesidades de persoal cualificado das empresas e o potencial das novas xeracións, fomentando a creación de emprego e o desenvolvemento económico do territorio.
O acto concluíu cun encontro entre participantes, empresas e representantes institucionais, reforzando os vínculos creados e abrindo novas oportunidades de colaboración e futuro profesional para a mocidade.
