A directora xeral de Traballo Autónomo e Economía Social, Marta Mariño, xunto coa delegada territorial da Xunta en Vigo, Ana Ortiz, visitou hoxe a cafetería Sen etiquetas, rexentada polo Centro Especial de Emprego Juan María. Este proxecto, inaugurado este ano, ten como obxectivo crear oportunidades laborais reais para as persoas con discapacidade intelectual.
Mariño salientou o valor desta iniciativa, que permite ás persoas formarse, desenvolver as súas capacidades e acceder a un emprego digno e estable. Subliñou o apoio da Xunta aos centros especiais de emprego, aos que se destinan 27 millóns de euros este ano.
A directora xeral tamén sinalou que o Centro Juan María se beneficia do programa autonómico de formación dual, que combina formación e emprego. Neste caso, a especialidade é de actividades auxiliares de comercio, buscando que as persoas con discapacidade intelectual obteñan un certificado de profesionalidade e faciliten a súa incorporación ao mercado laboral ordinario.
