A visita do rexedor, acompañado pola tenente de alcalde Elena Espinosa, tivo como obxectivo achegarse ao labor que desenvolven os diferentes grupos de investigación e o persoal científico, técnico e de xestión do centro. Foi recibido pola directora do IIM-CSIC, Beatriz Novoa, a vicedirectora técnica, Lucía Sánchez, o xerente, Alberto Espinosa, e a delegada do CSIC en Galicia, Carmen González.
Durante o percorrido polas instalacións, o alcalde puido coñecer directamente o traballo diario dos investigadores e investigadoras, así como as distintas capacidades que sustentan a investigación mariña. Tamén se puxo en valor a participación da comunidade do IIM-CSIC, incluíndo unha representación dos investigadores predoutorais que forman a futura xeración do centro.
O IIM-CSIC, que conta con 16 grupos de investigación e máis de 70 proxectos activos, combina a investigación coa formación, a divulgación e a transferencia de coñecemento. A súa actividade conecta os laboratorios coa sociedade e aborda retos como o cambio climático, a conservación dos ecosistemas mariños e a sustentabilidade das actividades ligadas ao mar.
“"Estamos moi orgullosos de que nos visite o alcalde de Vigo. Vigo é mar e é investigación, e é un dos lugares con máis talento investigador no mar. Que o alcalde se interese polas investigacións que facemos é un orgullo, porque o IIM é Vigo."
A directora do IIM-CSIC, Beatriz Novoa, destacou a importancia da visita para achegar á cidade o traballo do Instituto e dar a coñecer as investigacións dos seus 16 grupos sobre os problemas actuais do mar.
Pola súa banda, Abel Caballero salientou a relevancia da investigación mariña fronte aos efectos do cambio climático, cualificando o persoal do IIM como "as guerreiras do cambio climático" e o Instituto como "un luxo para Vigo".
