O director xeral de Comercio e Consumo, Gabriel Alén, visitou esta tarde Redondela e O Porriño para destacar accións orientadas a dinamizar o consumo local na comarca de Vigo. En Redondela, asistiu á Aloha Shopping Night 2026, organizada pola Asociación de Empresarios de Redondela, e no Porriño, participou na presentación da Tarxeta Activa Comercio O Porriño, promovida polo CCA Morea.
Ambas as iniciativas contan co apoio da Xunta, que este ano destinou máis de 2,35 millóns de euros a través dunha convocatoria que beneficiou a 56 centros comerciais abertos en toda Galicia. No caso de Redondela, case medio cento de establecementos participan na noite de compras, ofrecendo descontos e actividades complementarias como música e sorteos na praza da Constitución.
Ademais, a Asociación de Empresarios de Redondela recibirá unha achega extraordinaria para a campaña ‘Redondela no camiño’, que se celebrará o 27 e 28 de setembro. Esta iniciativa porá en valor a posición estratéxica da localidade como punto de confluencia das dúas variantes do Camiño Portugués, cunha feira de artesanía, comercio e produtos locais na zona de Vilavella.
No que respecta ao Porriño, a Tarxeta Activa Comercio busca fidelizar e atraer clientela ao comercio asociado. Os usuarios poderán adquirir por 30 euros unha tarxeta cun saldo de 40 euros, que poderán empregar no comercio local ata o 2 de outubro. Distribuiranse un total de 100 tarxetas.
Estas accións, apoiadas polo Goberno galego, contribúen a consolidar os centros comerciais abertos como axentes clave na dinamización económica das vilas e cidades, en liña co Plan estratéxico do comercio de Galicia 2025-2030.
