A visibilidade das mulleres que abriron camiño na ciencia é fundamental para construír unha sociedade máis igualitaria e para que as novas xeracións de nenas e mulleres poidan atopar referentes nos que recoñecerse. Aida Fernández Ríos representa un deses referentes imprescindibles, pioneira da investigación mariña e primeira muller en dirixir o Instituto de Investigacións Mariñas do CSIC.
O Concello de Santiago de Compostela impulsou o pasado 9 de outubro unha iniciativa de recoñecemento á súa figura coa instalación dunha placa conmemorativa no Parque das Ciencias Padre Sarmiento, dedicada á científica como pioneira e referente para as mulleres na ciencia.
A esta iniciativa súmase o Concello de Vigo, que o pasado 5 de novembro, a través da súa Concellería de Igualdade e en colaboración coa Real Academia Galega de Ciencias e o IIM-CSIC, celebrou un acto de homenaxe a Aida na Alameda de Bouzas. A cidade conta xa cunha placa conmemorativa instalada nun dos bancos desta alameda, fronte ao mar.
“"O seu legado científico e humano merece ser lembrado e recoñecido, non só polas achegas que realizou ao coñecemento dos océanos, senón tamén polo camiño que abriu para tantas outras mulleres."
O acto en Vigo contou coa participación de Beatriz Novoa, directora do IIM-CSIC; Alicia Estévez, vicepresidenta da RAGC; e Abel Caballero, alcalde de Vigo. O alcalde anunciou tamén que a cidade dedicará proximamente unha rúa á memoria de Aida Fernández Ríos. Desde o IIM-CSIC agradecen a promoción deste recoñecemento, que achega a súa figura á cidadanía e mantén presente a súa contribución nos espazos públicos.
