O encontro, organizado pola AESIA, achegou á poboación coñecementos básicos sobre intelixencia artificial e os retos do seu uso. A cita reuniu no salón de actos da Deputación a preto de 80 persoas, entre profesionais do sector empresarial, xestorías, administración e público interesado na lexislación sobre IA.
Os datos recompilados pola AESIA reflicten distintas percepcións sociais: o 29% considera a intelixencia artificial un cambio imparable, o 26% percíbea como unha ameaza e o 22% entende que debe ser gobernada, segundo as opinións recollidas no seu Laboratorio de Ideas.
A xornada tamén analizou o papel da intelixencia artificial na difusión da desinformación, destacando a capacidade destas ferramentas para crear contidos falsos e enganosos a grande escala. Subliñouse a importancia de desenvolver unha mirada crítica e aprender a verificar a información.
Abordouse ademais a menor presenza feminina no desenvolvemento tecnolóxico e os nesgos que poden reproducir os sistemas, afondando na brecha de xénero con consecuencias no emprego, igualdade de oportunidades e seguridade dixital. As achegas tamén contribúen á análise sobre protección de datos, menores e transformacións no mercado laboral.
O deputado de Promoción Económica e Social, Pablo Rivera Capón, participou na apertura institucional, que tamén tratou cuestións de funcionamento e posibilidades da intelixencia artificial.
Este encontro coincide co desenvolvemento da estratexia propia de intelixencia artificial da Deputación de Lugo, MencIA 2026-2030, orientada a impulsar a aplicación destas ferramentas nos servizos públicos e concellos da provincia. Os orzamentos da institución provincial para 2027 contemplan unha partida para continuar o desenvolvemento desta estratexia.
A incorporación da intelixencia artificial á Administración enténdese como unha ferramenta de apoio ao traballo dos empregados públicos, non como un substituto, co obxectivo de simplificar tarefas e axilizar procedementos baixo supervisión profesional e criterio humano.
