Esta iniciativa busca achegar á comunidade escolar os valores e a riqueza ambiental dos catro arquipélagos que conforman este espazo natural: Cíes, Ons, Sálvora e Cortegada. O programa está dirixido ao alumnado e profesorado pertencente aos concellos de Bueu, Vilagarcía de Arousa, Ribeira e Vigo.
Inclúe actividades didácticas como xogos, contacontos e presentacións audiovisuais, adaptadas a todos os niveis educativos, desde Educación Infantil ata Bacharelato. As actividades poderán solicitarse ata o próximo 15 de marzo de 2027 e desenvolveranse tanto no Centro de Visitantes do Parque Nacional en Vigo como nos propios colexios.
Ademais, as aulas poden participar no concurso ‘O Parque Nacional coa Escola’, presentando traballos sobre os valores naturais e culturais dos arquipélagos. Os colexios gañadores visitarán as illas na primavera cunha ruta interpretativa.
Desde a súa posta en marcha en 2017, o programa implicou unha media de 50 centros e 2.000 alumnos por curso, sumando máis de 26.000 escolares. A dirección do Parque Nacional xa traballaba con outras fórmulas didácticas desde 2004, superando os 40.000 participantes totais.
Os docentes valoran positivamente o programa pola adaptación das metodoloxías e dinámicas aos distintos niveis educativos. A Xunta tamén anima os centros a contactar co equipo de guías do Parque Nacional para estudar colaboracións en proxectos educativos sobre as Illas Atlánticas, os espazos protexidos ou o mar.
