A Xunta de Goberno do Concello de Vigo deu luz verde este venres á proposta de concesión do estadio municipal de Balaídos ao Real Club Celta. O acordo establece un período de 50 anos, prorrogable ata 75, cun canon anual de 802.837 euros, que se actualizará nun 2% anualmente. O prego de condicións detalla os dereitos e obrigacións de ambas as partes, incluíndo os requisitos para a celebración de eventos culturais e de lecer no recinto deportivo.
O canon anual poderá ser revisado ou axustado en caso de perda de ingresos debido a obras, se a entidade deportiva realiza investimentos en melloras, ou se o club descende de categoría. Ademais, o documento contempla a posibilidade de que o Concello compense parte do canon achegando fondos ao Celta para a organización de eventos que promovan a cultura, o lecer e a marca Vigo, como concertos.
Para estes eventos, o club deberá presentar unha proposta de actividade cuxo retorno do investimento sexa superior ao 500% do canon a compensar. As actuacións propostas deben cumprir certos requisitos, como que o Concello sexa recoñecido como o único patrocinador institucional nas accións promocionais e que se inclúa a súa imaxe institucional. A administración local resérvase tamén o dereito á designación ou denominación do evento.
Entre as obrigacións do club celeste figuran facerse cargo dos gastos de subministracións, servizos, conservación, reparación, seguros, limpeza e seguridade. O Concello, pola súa banda, resérvase o dereito a modificar as condicións da concesión por interese público, inserir publicidade institucional no estadio e utilizar as pistas e instalacións situadas baixo a bancada de Río.
O Concello de Vigo, como propietario do Estadio Municipal, debe ser a administración con maior presenza institucional na primeira fila do palco de autoridades.
O prego tamén regula o acceso gratuíto dos membros da Corporación ao palco de autoridades, garantindo que o alcalde ou alcaldesa ocupe o posto de honra xunto á Presidencia do club, así como o posto contiguo para a autoridade designada polo Concello.
O alcalde, Abel Caballero, explicou que tras esta aprobación inicial, ábrese un período de información de 30 días para a presentación de alegacións. Unha vez resoltas, procederase á aprobación definitiva e á formalización do acordo. Caballero cualificou a decisión como "moi boa" para a cidade e para o club, expresando a súa satisfacción persoal como alcalde e como "afeccionado e seguidor e fan do Celta".
