A directora xeral de Traballo Autónomo e Economía Social, Marta Mariño, participou esta mañá no Porriño (Pontevedra) na ‘Xornada de talento e inclusión laboral da formación dual adaptada’. O evento, impulsado pola Asociación de apoio ás persoas con diversidade intelectual (Aceesca), coincide coa próxima clausura de dous proxectos formativos desenvolvidos nos últimos tres anos co apoio autonómico.
Un dos programas céntrase nas operacións básicas de restaurante e bar, combinando a formación coa atención ao público na cafetería Lume. Paralelamente, Aceesca desenvolve un proxecto sobre actividades auxiliares de viveiros, xardíns e centros de xardinaría, que se leva a cabo na Escola Profesional Lume, situada no polígono das Gándaras do Porriño.
Na clausura da xornada, Marta Mariño, acompañada pola delegada da Xunta en Vigo, Ana Ortiz, e polo alcalde do Porriño, Alejandro Lorenzo, subliñou que os participantes obterán certificados de profesionalidade que facilitarán a súa incorporación ao mercado laboral ordinario. Tamén puxo en valor o Centro Especial de Emprego (CEE) Lume, que emprega a máis de 60 persoas, e celebrou a oportunidade que brinda o evento para que as empresas da contorna coñeza o aprendido polos alumnos e favoreza futuras contratacións.
