Este evento de referencia no Espazo Atlántico Europeo, organizado polo Clúster Tecnolóxico Empresarial das Ciencias da Vida (Bioga) co apoio da Zona Franca de Vigo, busca impulsar a colaboración público-privada e proxectar a Galicia como un referente en innovación biotecnolóxica.
“"Vigo é unha cidade emprendedora, con iniciativa e talento, onde se están fraguando proxectos que marcarán o paso da biotecnoloxía en España e Europa."
Entre as novidades desta edición, destaca a inclusión do BioHackathon, un evento multidisciplinar para doutorandos e investigadores que buscará solucións innovadoras a retos empresariais. Tamén se celebrarán os BioTalent Meetings, unha plataforma de networking para conectar talento emerxente con empresas líderes, e unha nova edición dos BioInvestor Days, que facilitará a presentación de proxectos ante máis de 30 fondos de investimento.
O foro contará coa participación de destacados relatores internacionais e ofrecerá un BioBusiness Tour para que os asistentes poidan coñecer de preto o ecosistema biotecnolóxico galego, incluíndo visitas a instalacións como Zendal, Anfaco e o Parque Empresarial de Porto do Molle, na zona de Vigo–O Porriño, así como centros en Santiago de Compostela.
Galicia Biodays 2026 está dirixido a empresarios, emprendedores, directivos, investidores, investigadores, académicos e estudantes interesados nas últimas tendencias e oportunidades de colaboración no sector das ciencias da vida. As inscricións xa están abertas na web oficial do evento.
