O volume, que ofrece unha visión actualizada das tecnoloxías de fabricación baseadas no uso do láser, foi editado por sete investigadores vinculados ao grupo LaserON: Juan Pou, Fernando Lusquiños, Mohamed Boutinguiza, Félix Quintero, Antonio Riveiro, Rafael Comesaña e Jesús del Val. A publicación é froito de máis de 30 anos de experiencia do grupo e da súa colaboración con centros de referencia internacional como o Fraunhofer Institute (Alemaña), o Laser Zentrum Hannover (Alemaña), o Advanced Manufacturing Research Center da University of Sheffield (Reino Unido), a Ruhr University Bochum (Alemaña), a KU Leuven (Bélxica), a Universitat de Barcelona e a Leibniz University (Alemaña).
Juan Pou, coordinador de LaserON, explica que o libro busca reunir os fundamentos das principais tecnoloxías de fabricación mediante láser e os avances máis recentes, sendo tamén un reflexo das colaboracións científicas internacionais do grupo.
Laser Based Manufacturing abarca 15 capítulos que detallan desde os fundamentos físicos da interacción láser-materia ata tecnoloxías industriais como o corte, a soldadura, o recubrimento de superficies, a fabricación aditiva e o marcado. Tamén explora aplicacións avanzadas como a polimerización mediante absorción de dous fotóns, a transferencia de materiais inducida por láser, a fabricación de nanofibras e a síntese de nanopartículas, cubrindo procesos desde a fabricación industrial ata a micro e nanotecnoloxía.
A obra inclúe tamén capítulos sobre a modelización dos procesos, os avances tecnolóxicos máis recentes e a sustentabilidade na implantación de novas tecnoloxías de fabricación. Está dirixida a investigadores, profesionais e estudantes de enxeñaría, buscando ser unha referencia que combine fundamentos científicos e aplicacións industriais.
“"Con este libro quixemos reunir nunha mesma obra os fundamentos das principais tecnoloxías de fabricación mediante láser e algúns dos avances máis recentes neste campo. É tamén o resultado de moitos anos de traballo do noso grupo e das colaboracións científicas que fomos establecendo con investigadores de diferentes países."
