A Universidade de Vigo amosa na Higher Education Transformation Week (HET Week), que se celebra en Bruxelas, os seus proxectos de transformación da educación superior en Europa. A iniciativa, organizada pola European University Foundation, reúne proxectos Erasmus+ KA2 que contribúen á innovación docente, competencias de futuro, mobilidade, inclusión, dixitalización e sustentabilidade no ámbito universitario.
A delegación da UVigo está encabezada polos coordinadores dos proxectos MicroHEI (Fernando Cerdeira) e DACEM (Manuel Caeiro), ambos liderados pola universidade viguesa, e pola investigadora Raquel Lozano en representación de GreenEURproject. A participación tamén inclúe encontros con outras institucións para coñecer boas prácticas e reforzar contactos europeos, segundo explica Eva Garea, directora da Área de Proxectos Internacionais de Educación da Oficina de Proxectos Internacionais (OPI) da UVigo, quen tamén participa xunto a Lorena Diana Gatea, técnica de promoción de proxectos internacionais de educación.
O proxecto MicroHEI, centrado en microcredenciais para o desenvolvemento profesional do persoal universitario, conta cunha sesión propia. Con 400.000 euros de orzamento e 36 meses de duración, busca establecer unha base común entre seis institucións europeas para o recoñecemento da formación, con énfase nas competencias dixitais, verdes e inclusivas.
Pola súa banda, DACEM, outro proxecto Erasmus+ KA220-HED coordinado pola UVigo, utiliza a transformación dixital para facilitar a mobilidade académica, dixitalizando catálogos académicos e mellorando a xestión de procesos e ofertas educativas conxuntas.
A sustentabilidade está representada por GreenEURproject, coordinado pola Université de Lorraine, no que a UVigo participa xunto a institucións de Lituania, Luxemburgo e Turquía para reducir o impacto ambiental dos proxectos europeos.
A OPI da UVigo participa en sesións conxuntas para coñecer tendencias, metodoloxías e solucións de consorcios europeos, intercambiar experiencias e ampliar a rede de contactos, reforzando a presenza da universidade nas redes europeas de cooperación.
