O prazo de presentación de candidaturas para os galardóns, que buscan estimular o traballo no desenvolvemento das liñas de especialización do Campus Auga, remata o vindeiro 31 de xullo. Esta iniciativa, financiada pola Xunta de Galicia, pretende recoñecer a contribución da comunidade universitaria á singularización do campus de Ourense.
A convocatoria inclúe diferentes modalidades, como premios ao mellor traballo fin de grao ou mestrado, á mellor tese de doutoramento, á contribución científica de alto impacto publicada en 2023, 2024 ou 2025, ao mellor resultado de transferencia e á mellor acción de divulgación científica. Cada traballo debe vincularse a unha das liñas de especialización do Campus Auga: alimentación funcional, agricultura e medio ambiente, ou xestión da auga termal, así como ás áreas transversais de intelixencia artificial, economía circular e lexislación agroalimentaria e ambiental.
Poderán concorrer o persoal docente e investigador e o alumnado da Universidade de Vigo matriculado nos cursos 2023-2024 ou 2024-2025. As candidaturas serán avaliadas por unha comisión presidida polo director do Campus Auga, e composta por membros do persoal docente e investigador e un representante da empresa Viaqua Gestión Integral de Aguas de Galicia. Valoraranse aspectos como a vinculación coas liñas de traballo, a calidade e o impacto do mérito presentado.
Os premios consistirán nun recoñecemento público oficial e unha dotación económica que varía segundo a modalidade. En total, a dotación ascende a 12.000 euros, financiada a través dun convenio de colaboración entre a Universidade de Vigo e a Consellería de Educación, Ciencia, Universidades e Formación Profesional da Xunta de Galicia.
