A unidade móbil da Axencia de Doazón de Órganos e Sangue (ADOS) estará presente o xoves 17 de setembro nas inmediacións do Hospital Álvaro Cunqueiro, en Vigo, co obxectivo de fomentar a solidariedade dos profesionais sanitarios e da cidadanía. A campaña de doazón terá lugar entre as 09:30 e as 14:30 horas, coa unidade móbil estacionada na entrada principal do centro hospitalario.
A iniciativa, promovida por ADOS e a Xerencia do Hospital, busca facilitar o acceso á doazón para os traballadores e traballadoras sanitarios, profesionais que coñecen de primeira man a necesidade das doazóns de sangue para o labor asistencial. Deste xeito, recoñécese o seu compromiso diario co sistema público de saúde de Galicia.
Esta campaña enmárcase nas colectas habituais que ADOS realiza en empresas e organismos públicos de toda Galicia. O Hospital Álvaro Cunqueiro xa acolleu 18 campañas de doazón de sangue desde o ano 2017, sumando un total de 444 doazóns nestas xornadas.
ADOS subliña a importancia da participación nestas campañas, lembrando que cada día precísanse máis de 400 doazóns de sangue para garantir o labor asistencial nos centros hospitalarios.
A Axencia de Doazón de Órganos e Sangue agradece o xesto xeneroso de todas as persoas que doan sangue, e de maneira especial aos profesionais do Hospital Álvaro Cunqueiro e aos seus usuarios, destacando a implicación e sensibilidade deste centro coas campañas de doazón desde a súa inauguración.
