A Universidade de Vigo, a Universidade da Coruña e a empresa Aldaba deron continuidade á súa Cátedra Aldaba WIB: Women, ICT & Business, posta en marcha a finais de 2019. A renovación do convenio, asinada este xoves, prolongará a actividade da cátedra durante catro anos máis, co fin de potenciar e enriquecer o progreso das Tecnoloxías da Información e a Comunicación (TIC) desde unha perspectiva de xénero.
A reitora da Universidade de Vigo, Carmen García Mateo, cualificou a cátedra como “un exemplo de éxito” na cooperación interuniversitaria e co sector empresarial, subliñando a súa importancia para construír “unha sociedade cada vez máis xusta e igualitaria”. Destacou o foco da iniciativa na “potenciación das vocacións femininas no mundo das TIC”, un ámbito onde aínda se persegue a igualdade.
Pola súa banda, o reitor da Universidade da Coruña, Ricardo Cao, resaltou que a cátedra representa “o que deben ser as cátedras institucionais, espazos de colaboración real entre universidade e empresa ao servizo da sociedade”. Lembrou que a presenza de mulleres en estudos de enxeñaría informática rolda só o 14% e afirmou que a renovación é “unha aposta polo talento sen barreiras, pola igualdade de oportunidades e por un sistema tecnolóxico e innovador máis diverso e forte”.
Enrique Fernández, socio-conselleiro de Aldaba, expresou a satisfacción da empresa co desenvolvemento da cátedra, á que destinaron máis de 150.000 euros desde a súa creación. Sinalou a preocupación da empresa pola baixa motivación das mozas cara ao mundo TIC e advertiu das consecuencias de que a intelixencia artificial futura sexa deseñada maioritariamente por homes, xerando nesgos.
A directora da cátedra pola Universidade de Vigo, Alma Gómez Rodríguez, e a directora pola Universidade da Coruña, Virginia Mato, puxeron en valor o traballo realizado para que “a tecnoloxía sexa cada vez máis de todos” e para contribuír a un sector TIC “máis diverso e plural”.
O convenio, cunha duración de catro anos, establece unha dotación anual de 20.000 euros achegados por Aldaba. As liñas de actuación estratéxicas da cátedra seguirán sendo a formación, a investigación e a divulgación, promovendo a participación feminina nas TIC e establecendo canles de colaboración universidade-empresa.
En formación, prevese un programa de bolsas en prácticas, actividades formativas para actualizar competencias TIC empresariais, seminarios impartidos por profesionais, colaboración en traballos fin de estudos e axudas a alumnas para asistir a congresos tecnolóxicos.
No eido da investigación e transferencia, desenvolveranse liñas de investigación conxuntas, cooperación en proxectos rexionais, nacionais ou europeos, e conectarase empresas con necesidades innovadoras en TIC con grupos de investigación universitarios.
En divulgación, realizaranse actividades para dar a coñecer a participación das mulleres no sector TIC, dirixidas a estudantes de colexios e institutos, e publicarase contido de interese nas redes sociais e na páxina web da cátedra.
Desde a súa posta en marcha, a cátedra xa organizou iniciativas como o campamento tecnolóxico Aldaba-TIC Camp, o ciclo de charlas Aplicacións prácticas das TIC na empresa, o programa de bolsas Aldaba-WIB, e o barómetro BBG-TIC para analizar a fenda de xénero nas titulacións tecnolóxicas galegas.
