O Reggaeton Beach Festival, un dos eventos de música urbana máis importantes de Europa, comunicou este xoves a suspensión de toda a xira programada para este verán e o fin das súas actividades. A cancelación afecta a festivais previstos en localidades como Nigrán, Tenerife, Barcelona, Alacante, Santander, Mallorca e Madrid.
Segundo un comunicado emitido pola dirección, a decisión tomouse tras unha análise da situación global do proxecto, constatando que a estrutura operativa e financeira da compañía xa non permite garantir a organización e o desenvolvemento dunha xira destas características. A nova administración sinala a existencia de circunstancias económicas, financeiras e operativas que comprometen significativamente a viabilidade do proxecto.
A organización recoñece ser "plenamente consciente da decepción e das consecuencias" que esta noticia xerará en asistentes, artistas, institucións, patrocinadores, provedores e colaboradores. Actualmente, a sociedade está a xestionar as implicacións económicas, contractuais e administrativas, e nos próximos días comunicaranse os procedementos a seguir para os colectivos afectados.
O RBF, que experimentou un "crecemento extraordinario" nos últimos anos converténdose nunha plataforma de referencia en Europa, despídese tras oito anos de historia na música urbana. A dirección destaca o recordo de "miles de momentos compartidos" e a contribución ao crecemento dunha cultura musical de alcance global.
Nos quedamos con miles de momentos compartidos
