O Concello de Redondela presentou alegacións formais contra a proposta final do Estudo Ambiental Estratéxico (Alternativa 4) da Delimitación de Espazos e Usos Portuarios (DEUP) da Autoridade Portuaria de Vigo. O goberno local rexeita o mantemento e a ampliación de usos comerciais e industriais no litoral de Chapela e Rande, ao considerar que o modelo proposto é incompatible coa recuperación ambiental da zona.

O Concello sostén que o documento mantén un enfoque centrado na actividade loxística e industrial, o que dificulta a recuperación do litoral para o uso cidadán e a protección ambiental. Redondela reclama un cambio cara a un modelo máis equilibrado de relación porto-cidade, con maior peso da integración paisaxística e a posta en valor do patrimonio.

Insístese especialmente na necesidade de actuar sobre a contorna do Peirao de Pedra e o cargadeiro de mineral de Coto-Wagner, polo seu elevado valor histórico, cultural e paisaxístico. Estes espazos son considerados clave dentro do litoral da enseada de San Simón.

O Concello solicita reducir a superficie destinada a usos industriais complementarios, revisar a delimitación prevista e incorporar medidas de rexeneración ambiental que melloren a calidade de vida da veciñanza de Chapela e Rande. Con estas alegacións, o goberno local reafirma o seu compromiso cun modelo sostible que compatibilice actividade económica, protección da contorna e uso público do litoral.