O municipio de Redondela consolida a súa aposta pola protección ambiental e a saúde pública ao revalidar a Medalla de Ouro da Rede Galega de Praias sen Fume. Este distintivo confirma que a totalidade dos areais do termo municipal son espazos libres de tabaco e dispositivos electrónicos de vapeo.
O concelleiro de Medio Ambiente e Saúde, Alberto Álvarez, recolleu o diploma nun acto oficial da Consellería de Sanidade da Xunta de Galicia, presidido polo conselleiro Antonio Gómez Caamaño. Redondela intégrase así no selecto grupo de 13 concellos da provincia de Pontevedra que blindan toda a súa costa fronte ao fume.
Esta distinción reforza a estratexia do Goberno local para protexer a saúde da veciñanza e dos visitantes do tabaquismo pasivo e previr a contaminación por cabichas, un residuo prexudicial para os ecosistemas mariños.
A iniciativa de Redondela esténdese máis aló dos areais. A través da Mesa Local de Saúde e en colaboración coa Asociación Española Contra o Cancro (AECC), impulsouse a declaración do Paseo da Xunqueira e a Alameda de Castelao como novos «Espazos sen Fume». O alumnado dos institutos locais participou activamente neste proceso mediante votación popular.
Estas emblemáticas zonas de lecer xa contan coa sinalización correspondente para erradicar o tabaco e os vapeadores, co obxectivo prioritario de protexer á poboación infantil e xuvenil e evitar a normalización de hábitos nocivos nos espazos de convivencia diaria.
