O Concello de Baiona informou sobre os resultados das últimas analíticas realizadas dentro do Programa de Vixilancia Sanitaria das Zonas de Baño da Xunta de Galicia, que detectaron un episodio de contaminación microbiolóxica nas augas da praia de Santa Marta.
Seguindo o protocolo establecido para protexer a saúde pública, o Concello adoptou medidas preventivas neste areal, prohibindo temporalmente o baño. A prohibición manterase ata que novos controis confirmen que as augas cumpren as esixencias sanitarias.
O resto dos areais do municipio presentan unha calidade excelente e permanecen abertos ao baño con normalidade.
Dende que se coñeceron os resultados, estanse a realizar inspeccións e analíticas frecuentes na praia e no río Baiña, así como en canalizacións que desembocan no mar, en coordinación con Augas de Galicia e a empresa GESTAGUA, para detectar calquera posible vertido.
O Concello continuará informando sobre calquera novidade e agradece a colaboración e comprensión da cidadanía ante estas medidas, cuxo único obxectivo é garantir a seguridade e a protección da saúde dos usuarios das praias.
