Segundo informaron fontes do Tribunal Superior de Xustiza de Galicia (TSXG), o individuo está sendo investigado en tres causas distintas. Os feitos ocorreron os días 2, 5 e 9 de abril, e en cada un deles se lle imputa un delito de roubo con violencia e intimidación. A muller detida polos mesmos feitos foi posta en liberdade coa obriga de comparecer ante o xuíz.

Axentes da Policía Nacional da Comisaría de Vigo-Redondela detiveron aos dous sospeitosos despois de que fosen sorprendidos roubando combustible do depósito dun camión na madrugada do pasado 19 de abril. As investigacións posteriores permitiron vincular a ambos cos tres atracos aos taxistas.

O método de actuación do presunto autor consistía en solicitar un servizo de taxi nunha mesma zona da cidade e, ao finalizar o traxecto, intimidaba ao condutor ou condutora mediante agarres violentos e o uso dunha arma branca. Nun dos roubos, chegou a subtraer ata 400 euros. Nun dos episodios, o autor actuou acompañado dunha muller, e no último dos asaltos, a vítima sufriu unha ferida superficial na cara durante o forcexo.

A análise dos datos facilitados polas vítimas permitiu ao Grupo Operativo de Policía Xudicial do Distrito Centro (GOPJ Centro) establecer unha sólida liña de investigación desde os primeiros días do mes. O home foi detido como autor de tres asaltos, mentres que a muller o foi por un dos feitos delituosos que cometeron xuntos.