A programación, froito da colaboración entre o Concello de Pontevedra e a Universidade de Vigo, inclúe cinco xornadas dedicadas a series de televisión. As proxeccións terán lugar no salón de actos do edificio que comparten as facultades de Comunicación e Dirección e Xestión Pública, un espazo con capacidade para máis de 380 persoas que contará con equipos técnicos de alta calidade.
O ciclo comezará o sábado 10 de outubro coa serie Vida perfecta. A axenda continuará o venres 16 con Autodefensa, o sábado 17 con Paquita Salas, o domingo 25 con Fácil e finalizará o sábado 31 con Cardo. Cada sesión contará cun coloquio posterior no que participarán creadores e intérpretes das obras.
A asistencia a estas actividades é gratuíta. As entradas poderán retirarse na Oficina de Turismo da praza de España cunha semana de antelación respecto a cada pase, e tamén se habilitará un sistema de reserva en liña a través da plataforma municipal.
