O Concello de Redondela avanza na mellora dos seus espazos públicos grazas ao traballo dos participantes do Obradoiro de Emprego ‘Redondela Natureza’. Este programa formativo ofrece aos alumnos-traballadores a oportunidade de adquirir experiencia práctica en escenarios reais, executando obras de utilidade pública tanto no centro urbano como nas diferentes parroquias.
O módulo de carpintaría céntrase na mellora do equipamento público. Recentemente, iniciáronse os traballos de acondicionamento no paseo do río Pexegueiro e no que bordea o Monte da Telleira. As tarefas inclúen a limpeza, restauración de varandas e a fabricación de novo mobiliario como bancos, papeleiras e paneis informativos. Tamén se está instalando nova tarima no escenario do auditorio da Xunqueira e fabricando un portón de madeira para a torre de Pousadouro.
Pola súa banda, os participantes da especialidade forestal e de xardinería realizan tarefas de limpeza e posta en valor en contornas de xacementos arqueolóxicos como os de Monte Penide/Mirallo, ademais de actuacións na Coutada (Quintela) e Veiga da Moucheira (Reboreda). Tamén se encargarán do coidado e embelecemento das rotondas de acceso na N-552 (Cedeira e Rande), na EN555 (Vilar), na PO250 (Reboreda), en Vilavella e en Ernestina Otero.
O proxecto tamén ten unha vertente social e sostible. O alumnado xestiona unha explotación de agricultura ecolóxica na horta de Pousadouro, cuxos produtos se destinan a ONGs locais. O viveiro de Pousadouro produce plantas hortícolas, forestais e ornamentais que o Concello empregará no mantemento futuro das súas áreas verdes.
Ademais, está previsto o inicio en setembro dun novo obradoiro de emprego, ‘Talento Mozo de Redondela’, centrado nas especialidades de Pintura e Albanelería. A mocidade interesada, de entre 18 e 30 anos e inscrita como demandante de emprego no SEPE e no Sistema Nacional de Garantía Xuvenil, poderá formar parte do proceso de selección.
