As inmediacións do Campo da Feira, na Rúa Parque Infantil, acollerán unha nova zona lúdico-deportiva tras o inicio das obras este luns. A actuación municipal abarcará 557 metros cadrados para configurar un espazo pensado para o deporte, o esparcimento e a convivencia cidadá.
O proxecto inclúe a construción dunha pista de baloncesto 3×3 e outra para a práctica de fútbol sala, ademais da instalación de porterías, unha canastra antivandálica e unha rede de seguridade perimetral. Tamén se restaurarán os elementos biosaudables existentes e se mellorará o sistema de drenaxe e abastecemento de auga.
A intervención completarase con traballos de xardinaría, que incorporarán arborado, sebes e especies ornamentais para unha mellor integración paisaxística. Ademais, prevese a instalación de bancos, papeleiras e un cartel informativo, así como unha nova fonte pública.
“"Seguimos pensando no Porriño que queremos para o futuro e seguimos facéndoo realidade. Queremos unha vila con máis espazos públicos de calidade, pensados para facer deporte, convivir e desfrutar en familia."
O concelleiro de Servizos Rurais, Marcos Martínez, destacou que a iniciativa "permitiranos recuperar e acondicionar un espazo para poñelo ao servizo da veciñanza, dotándoo de novas instalacións e mellorando ao mesmo tempo a súa funcionalidade, seguridade e integración na contorna".
Esta actuación forma parte dun plan máis amplo do Concello para ampliar e renovar a área do Campo da Feira. O goberno local xa adquiriu parcelas e busca incorporar novos terreos próximos co obxectivo de crear unha gran zona de ocio e encontro.
O contrato para a execución xa está asinado e as obras, cun prazo estimado dun mes, comezarán este luns. "Damos un paso máis na transformación desta contorna, recuperando e mellorando espazos para poñelos ao servizo da veciñanza", concluíu o alcalde.
