O Club Furaventos organiza nas súas instalacións de Quintela, en Pontellas, o Campionato de España de Maquetas de Aeromodelismo, unha competición que se estenderá dende este venres ata o domingo 16 de agosto. O evento reunirá a pilotos procedentes de diversos puntos de España para amosar a súa habilidade na construción e voo de réplicas a escala de aeronaves.
A xornada inaugural, este venres, estará marcada pola recepción dos participantes e os voos de proba. O sábado 15 de agosto concentrará a maior parte da actividade competitiva, coas avaliacións de voo e a valoración estática das aeronaves. Os xuíces terán en conta a fidelidade da maqueta co modelo orixinal e a achega de documentación que verifique as similitudes, criterios que outorgarán maior puntuación.
O domingo 16 de agosto reservarase para completar probas pendentes, voos de exhibición e despedida, prevéndose o remate da actividade ao mediodía. O alcalde do Porriño, Alejandro Lorenzo, destacou a importancia de acoller este campionato, subliñando o nivel de compromiso e capacidade organizativa do municipio e a oportunidade de achegar o aeromodelismo á veciñanza.
O evento tamén está aberto ao público, que durante os descansos poderá observar as aeronaves de preto, coñecer os pilotos e fotografarse cos aparellos. As maquetas caracterízanse pola súa fidelidade aos avións reais e os seus voos lentos e precisos, reproducindo o comportamento dos orixinais.
Nesta edición participará Manuel Rodríguez, coñecido como Ivo, representante do Club Furaventos e natural do Porriño. Rodríguez, que competiu recentemente no Campionato Mundial de Maquetas en Inglaterra e foi Subcampión nacional en 2025, buscará ampliar o seu palmarés na súa localidade natal.
O Concello do Porriño pon en valor a capacidade do Club Furaventos para atraer competicións de ámbito nacional e internacional, consolidando así a localidade como un referente no aeromodelismo.
