A iniciativa, froito da colaboración entre a Unidade de Cultura Científica da Universidade de Vigo e o Concello de Vigo, enmárcase no proxecto Ciencia de Ida e Volta, que conta co financiamento da FECYT. Tras o éxito das funcións dirixidas a estudantes de secundaria, a obra ofrecerá dous pases para o público xeral, buscando maximizar o seu alcance e o aproveitamento do traballo artístico e científico desenvolvido.
A representación, que se desenvolverá no Museo Quiñones de León, é unha homenaxe á escritora Agatha Christie e adapta a súa novela 'Un cadáver en la biblioteca'. Os asistentes terán un papel activo na resolución do misterio, participando en probas científicas e interactuando cos personaxes para descubrir quen asasinou a Ruby Keene.
A actividade presenta unha adaptación da obra de Agatha Christie “Un cadáver en la biblioteca”, en formato de teatro inmersivo con contido científico-divulgativo. A proposta combina acción teatral e probas científicas, nas que o público participa activamente para resolver un misterio.
O elenco inclúe a Mónica Camaño no papel da señorita Marple, e a investigadores da Universidade de Vigo como Tino Quintela, que interpretará ao Marqués de Quiñones de León. Tamén participan Guillermo Blanco e André Vidal, xunto coa catedrática de Xenética Paloma Morán e a investigadora predoutoral Nerea Cazás, que encarnarán a doutoras.
As probas científicas, deseñadas por un equipo multidisciplinar da UVigo, inclúen a recollida de mostras de ADN e pegadas, análise toxicolóxica, palinoloxía (estudo do pole) e análise do idiolecto. Estas actividades permitirán aos participantes, divididos en grupos, colaborar cos investigadores para desentrañar as pistas e resolver o caso. Haberá dous pases, ás 17:30 e ás 18:30 horas, con capacidade para 50 persoas en cada sesión. A entrada é gratuíta, pero require reserva previa a través da plataforma Museos Educa.
