A mostra, do artista vigués Alberto Ardid, percorre o común e o cotián para construír unha realidade paralela. O director do Marco e comisario da exposición, Miguel Fernández-Cid, destacou o enfoque do artista, subliñando a súa capacidade para analizar o real e ver máis alá das aparencias.
“"Pasea por verdades e ve o que hai detrás das aparencias."
Pola súa banda, a comisaria Pilar Souto definiu ao creador como un artista que emprega a arte como ferramenta de pensamento crítico da sociedade actual, buscando que o visitante saia da exposición formulándose preguntas e cuestionando o seu contorno.
O propio Alberto Ardid explicou o carácter persoal do proxecto, lembrando a conexión do museo coa súa traxectoria vital e como o edificio foi clave na súa comprensión da arte. A exposición combina pezas a medio camiño entre a escultura e a instalación, organizadas nunha estrutura narrativa interconectada.
“"O museo existía cando comecei a desenvolver certa consciencia artística."
O conxunto articúlase arredor dun aparente triunfo do mal sobre o ben, no que aínda se pode albiscar algún raio de esperanza. O alcalde de Vigo, Abel Caballero, pechou o acto institucional resaltando o valor do proxecto e do propio museo como motor cultural da cidade.
A exposición Hai un lugar estará aberta ao público no Museo de Arte Contemporánea de Vigo desde o 30 de abril ata o 6 de setembro de 2026, no horario habitual do centro, con visitas guiadas ás 18 horas. Ademais, o Marco investirá 121.000 euros en melloras estruturais, incluíndo novas baixantes para patios e lucernarios, así como reparacións nas cubertas.
