A nova infraestrutura reforzará as capacidades do centro tecnolóxico galego para desenvolver, adestrar e validar robots humanoides e solucións de automatización industrial, situando a área de Vigo como enclave de referencia neste ámbito.

O CTAG anunciou a creación de HAARO, un novo laboratorio de humanoides e robótica avanzada co que reforzará as súas capacidades para desenvolver, validar e demostrar solucións tecnolóxicas destinadas á automatización industrial e á fábrica do futuro. O CTAG resaltou que HAARO “representa unha aposta estratéxica por un ámbito con alto potencial transformador para a industria”, situando a área de Vigo como “enclave de referencia no desenvolvemento destas tecnoloxías”.

HAARO está orientado ao adestramento, simulación, ensaio e validación de sistemas humanoides e doutras tecnoloxías de robótica avanzada en contornas industriais. A diferenza da robótica tradicional baseada en programación, este novo laboratorio apóiase na aprendizaxe por reforzo e no adestramento virtual, onde o robot adquire capacidades mediante a repetición de accións, evolucionando cara a sistemas máis autónomos e adaptativos.

“O obxectivo é consolidar o CTAG como o espazo onde a industria poida desenvolver, adestrar, validar e despregar robots humanoides con garantías de seguridade, fiabilidade e baixo criterios éticos, facilitando a súa incorporación real en contornas produtivas”, destacou Luis Moreno, director xeral do CTAG.

Desde finais de 2024, o CTAG traballa no desenvolvemento de tecnoloxías de robótica humanoide, centradas na IA física, abordando a súa aplicación tanto no ámbito industrial como en contornas asistenciais e residenciais. Esta liña de traballo combina o desenvolvemento de novas capacidades tecnolóxicas coa resolución de casos de uso reais e o acompañamento do ecosistema innovador, incluíndo startups.

Neste contexto, o CTAG adaptou as súas instalacións para xerar contornas de ensaio orientadas a distintos casos de uso, integrando medios físicos e dixitais que permiten validar habilidades e a súa aplicación en procesos industriais concretos.

O obxectivo é dispor de solucións transferibles á industria que contribúan a mellorar a súa competitividade. Durante a xornada presentáronse as capacidades tecnolóxicas que dan soporte a HAARO, incluído o uso do xemelgo dixital como ferramenta clave para o desenvolvemento, simulación e validación de solucións, así como varios casos de uso en robótica avanzada aplicada ao ámbito industrial.

A creación de HAARO forma parte da estratexia do CTAG para impulsar o futuro Polo Tecnolóxico de Humanoides, un proxecto que aspira a situar Galicia á vangarda europea da robótica aplicada á industria.