O Club Vigo xa coñece a súa folla de ruta para a tempada 2026/2027. A pesar de non conseguir o ano pasado meterse entre os catro mellores equipos, o club vigués estará finalmente presente na máxima categoría da Superliga 2, competindo no Grupo A. O calendario da competición comezará o tres de outubro, e o primeiro partido dos vigueses será como locais en Coia ante o Tarragona.
Segundo explica Diego Taboada, adestrador do club, esta posibilidade deuse tras "a renuncia doutro club". Taboada subliña que competir coas mellores escadras é unha vantaxe para o desenvolvemento deportivo do club: "Nós queriamos competir cos mellores porque é a forma de seguir crecendo".
O técnico recoñece o traballo complicado que teñen por diante, medíndose aos mellores equipos da liga. O obxectivo para esta campaña é "permanecer entre os oito mellores" para asegurar a presenza no Grupo A na seguinte tempada. Esta meta complícase coas baixas de xogadores clave como Pau Mena, Isaac Pachés e Jakub Kocvara, entre outros.
Taboada cualificou a saída destes xogadores como "unha decisión complicada, pero necesaria". "Os proxectos, de cando en vez, hai que melloralos e cremos que é un momento de cambio e intentar facer un cadro un pouco máis compensado", sinalou o adestrador sobre a xestión da plantilla.
