Este acordo, que terá unha duración inicial de 50 anos con posibilidade de prórroga ata un máximo de 75, outorga ao club a explotación exclusiva do estadio e os seus espazos. Isto inclúe tanto o uso deportivo como actividades compatibles, como usos terciarios, que non poderán superar o 50% da superficie total.

O alcalde Abel Caballero subliñou que esta cantidade poderá axustarse en función de futuras inversións no estadio, acordos para eventos culturais ou posibles perdas de ingresos durante obras. O Real Club Celta de Vigo terá dereito á explotación integral do estadio, incluíndo a comercialización de dereitos audiovisuais, a organización de eventos e a posibilidade de establecer unha denominación comercial.

Entre as obrigas do club, figuran asumir os custos de mantemento, conservación, seguridade e subministracións, ademais de presentar anualmente un plan de mantemento. Unha condición “de primeirísima magnitude”, segundo o rexedor, é que Balaídos deberá seguir sendo a sede do primeiro equipo. Pola súa banda, o Concello resérvase o uso do estadio para eventos de interese xeral e a presenza da súa marca nos espazos publicitarios en todos os eventos.

O acordo inicia agora un período de información pública de 30 días hábiles. Se non se presentan alegacións, a aprobación será definitiva; en caso contrario, deberán resolverse antes da sinatura final entre o Concello e o club. Caballero insistiu en que se trata do “principio do procedemento”, mostrando confianza no seu desenvolvemento.