A Consellería de Sanidade, a través do Servizo Galego de Saúde, adxudicou á empresa Ángel Jaime Santorio Cuartero a redacción do proxecto básico e de execución, así como a dirección de obra, do novo centro de saúde de Mos. O importe da adxudicación ascende a 287.010 euros e o prazo de execución é dun ano e catro meses.
O prazo para a redacción do proxecto básico é dun mes e medio desde a formalización do contrato. Unha vez aprobado este, disporase de dous meses adicionais para a redacción do proxecto de execución. A previsión é que as obras, cun investimento estimado pola Xunta de 4,7 millóns de euros, poidan licitarse tras a aprobación do proxecto e iniciarse no primeiro trimestre de 2027.
O novo centro de saúde, que se integrará no complexo sociosanitario do Rebullón, duplicará a superficie actual nun 65 %, alcanzando os 2.740 metros cadrados útiles distribuídos en dúas plantas. Esta ampliación permitirá mellorar os servizos e incorporar novas áreas.
Contará cunha área pediátrica específica con dúas consultas de medicina, dúas de enfermería pediátrica, unha sala de lactancia e outra polivalente para pacientes respiratorios. Na área médica, haberá 11 consultas de medicina de familia, 11 de enfermería, unha de matronas, unha de farmacia, un despacho de traballo social e dúas salas polivalentes para probas diagnósticas como ecografías ou espirometrías. Tamén se incrementan as consultas de formación a residentes.
Ademais, o centro incluirá unha nova sala de cirurxía menor, unha consulta de nutricionista e un ximnasio de fisioterapia. Na área da muller, habilitarase unha sala de educación sanitaria para programas de rehabilitación de solo pelviano. A área de urxencias disporá dunha sala de observación, unha de reanimación, unha nova sala de traballo de enfermería e dous vestiarios.
