O equipo vigués, dirixido por César Iglesias, acadou o ansiado ascenso despois de superar a Obradoiro e Ensino o pasado fin de semana. Este logro pon fin a anos de esforzo do club por ter un representante a nivel nacional.

O proxecto do Novobasket céntrase na canteira, co obxectivo de consolidar un equipo senior que sirva de referente para os xogadores locais e evite a súa fuga a outros clubs. O técnico sinalou a importancia de "ter un proxecto senior en Vigo e que a xente non se vaia".

A participación na Terceira FEB aínda non está garantida, xa que o club debe cumprir requisitos económicos e de infraestruturas da Federación Española de Baloncesto. O Pabellón de Quirós, en particular, necesita adaptacións, como o cambio de canastas.

O club agarda reunirse coas institucións para abordar estas necesidades e confía en que se solucionen a tempo para poder competir a próxima tempada. Mentres tanto, o Marín Peixegalego tamén afronta a fase final para ascender á Segunda FEB.