A empresa Ángel Jaime Santorio Cuartero foi a adxudicataria dos servizos de redacción do proxecto básico e de execución, así como da dirección de obra, do futuro centro de saúde de Mos. O importe da adxudicación ascende a 287.010 euros, cun prazo de execución total dun ano e catro meses.
O proceso de redacción do proxecto básico terá unha duración dun mes e medio dende a formalización do contrato. Unha vez aprobado este, disporase de dous meses adicionais para a redacción do proxecto básico e de execución completo. Tras a aprobación definitiva do proxecto, o Executivo galego licitará as obras, nas que se prevé investir 4,7 millóns de euros, co obxectivo de que os traballos poidan comezar no primeiro trimestre de 2027.
O novo centro de saúde, que se construirá no concello de Mos, contará con dúas plantas e unha superficie útil total de 2.740 metros cadrados, o que representa un incremento do 65% en comparación coas instalacións actuais.
O plan funcional do novo centro de saúde inclúe espazos específicos para pediatría, con dúas consultas de medicina, dúas de enfermería pediátrica, e novidades como unha sala de lactancia e outra polivalente para pacientes respiratorios. Na área médica, haberá 11 consultas de medicina de familia, 11 de enfermería, unha de matronas, unha de farmacia, un novo despacho de traballo social, dúas salas polivalentes para probas diagnósticas como ecografías ou electrocardiogramas, e seis consultas de formación para residentes MIR e EIR.
Ademais, prevese unha nova sala de cirurxía menor, unha consulta de nutricionista e un ximnasio de fisioterapia. Amplíase tamén a carteira de servizos na área da muller cunha sala de educación sanitaria para programas de rehabilitación do solo pelviano. Na área de urxencias, que terá sala de observación e reanimación, habilitaranse tamén unha nova sala de traballo de enfermería e dous vestiarios.
