A competición reuniu un total de 239 xadrecistas chegados de 20 países no Pavillón Universitario de Pontevedra. O torneo, organizado pola Escola Xadrez Pontevedra (EXP) coa colaboración da Vicerretoría do campus, o Concello de Pontevedra e a Deputación Provincial, celebrou a súa novena e derradeira xornada este xoves.
Na categoría máster, Muthaiah Al alzouse coa vitoria final tras superar a Sayantan Das nunha partida de preto de cinco horas. Ambos finalizaron con sete puntos, pero o desempate outorgou o triunfo ao xadrecista indio. Tamén con sete puntos remataron o gran mestre indio Raja Rityvik R e o mestre internacional cubano Luis Daniel Rodríguez.
A xadrecista india de trece anos, Modipalli Deekshitha, recibiu o premio á mellor clasificada feminina, acadando ademais a norma de mestra internacional. Este torneo foi o único en Galicia puntuable para estes títulos internacionais.
Na categoría amateur, para xadrecistas con menos de 2000 puntos no ránking Fide, a vitoria foi para Ricardo Oubiña, mentres que Irene Diz acadou o premio á mellor clasificada feminina.
O torneo repartiu un total de 13.000 euros en premios económicos, ademais de galardóns para mellores veteranos, xadrecistas de categorías de base e o Trofeo Ramón Escudeiro Tilve á mellor partida de ataque. A edición contou con participantes de entre 7 e 81 anos, e destacou a participación dunha delegación da ONCE, incluíndo a selección española xuvenil de xadrez para persoas cegas e con discapacidade visual.
