A directora da Axencia Galega de Innovación, Carmen Cotelo, visitou esta mañá a sede da empresa biotecnolóxica ODS Protein, situada no polígono industrial da Granxa, no Porriño. A compañía, fundada en 2021 por investigadores da Universidade de Vigo, céntrase no desenvolvemento de proteínas alternativas para a industria alimentaria de xeito sostible, utilizando a fermentación de biomasa con fungos filamentosos.
ODS Protein recibiu no ano 2025 unha axuda de máis de 231.000 € do programa Neotec da Xunta para o seu plan de negocio ata 2027. Esta subvención foi concedida tras participar na convocatoria estatal e quedar sen financiamento por falta de crédito, sendo rescatada pola iniciativa autonómica.
“"O apoio ao crecemento das empresas de base tecnolóxica e baseadas no coñecemento forma parte da aposta da Xunta de Galicia por fortalecer a I+G+i e converter a nosa Comunidade nunha referencia no impulso a startups innovadoras."
A Xunta convocará proximamente a edición 2026 da liña de axudas Neotec, dotada con 2,6 millóns de euros de fondos europeos (programa Galicia Feder 21-27). Esta convocatoria busca financiar proxectos innovadores de empresas galegas que superaron os criterios da convocatoria estatal do CDTI pero quedaron fóra por falta de crédito. As axudas poderán chegar ata os 325.000 euros por proxecto, con maior intensidade para aquelas tecnoloxías STEP (biotecnoloxía, intelixencia artificial, cuántica, enerxías limpas).
Desde 2021, o Goberno galego apoiou a través desta liña a 34 empresas cun investimento de 11,7 millóns de euros, o que permitiu financiar máis de 220 postos de traballo en sectores como as TIC e a biotecnoloxía. Coa nova convocatoria, o investimento total da Xunta nestas axudas acadará os 14,3 millóns de euros.
ODS Protein tamén participou en aceleradoras como ViaGalicia e programas de Bonos de Innovación, que lle permitiron avanzar no desenvolvemento da súa tecnoloxía e no escalado industrial dos seus procesos, respondendo á necesidade de producir alimentos cun menor impacto ambiental.
