A ciencia saíu dos laboratorios para atoparse coa cidadanía en Vigo, Ourense e Pontevedra grazas á celebración da G-Night, a Noite Galega das Persoas Investigadoras. Un centenar de investigadoras e investigadores da Universidade de Vigo (UVigo), xunto a persoal doutras entidades, participaron nesta iniciativa para divulgar os principios e aplicacións do seu traballo de xeito aberto e participativo.
O epicentro da xornada en Vigo estivo no edificio Redeiras e na praza do Berbés, onde se concentraron a maior parte das 40 actividades organizadas pola UVigo. A institución viguesa coordinou esta edición, que contou coa participación de universidades como a da Coruña e a de Santiago de Compostela, así como institutos do CSIC e outros centros de investigación galegos.
A reitora da UVigo, Carmen García Mateo, visitou a feira na praza do Berbés, acompañada polo alcalde de Vigo, Abel Caballero, e outras autoridades. García Mateo destacou que a G-Night representa a aposta da universidade por achegar a ciencia á cidadanía e mostrar o valor da investigación. "Unha universidade pública debe xerar coñecemento, pero tamén compartilo e facelo comprensible e útil para a sociedade", afirmou.
O Centro de Investigación Mariña (CIM), parte da UVigo, tivo unha destacada presenza co taller 'As plantas non (só) son verdes' e a obra de teatro e monicreques 'Ostras e estrelas', que puxo en valor o traballo da muller na ciencia. Tamén se realizou un obradoiro de microscopía e acuicultura.
As actividades do CIM completáronse cun paseo científico en barco pola ría de Vigo a bordo da embarcación Inndaga. Durante a travesía, recolléronse mostras que posteriormente foron analizadas na feira científica, permitindo ao público coñecer de preto os fondos mariños.
A G-Night, que se celebra en máis de 450 cidades europeas, contou en Vigo coa colaboración do Concello e o apoio do Consello Social da Universidade de Vigo. O CIM conta co recoñecemento Cigus da Xunta de Galicia e a súa actividade está cofinanciada pola Unión Europea a través do programa Feder-21-27.
