O evento, que tivo lugar de forma simultánea nas sedes do atlanTTic da UVigo e do CITIC da UDC, incluíu un obradoiro sobre análise forense de dispositivos IoT, impartido por Rafael López García, David Diz Nieves e Pablo Rodríguez Cascón. Na apertura institucional participaron Manuel González Penedo, director do CITIC, e Javier González Castaño, director de atlanTTic. A conferencia principal, "Estamos vindo moi arriba: un percorrido pola seguridade ata a IA", foi impartida por Uxío Fuentefría, Staff Backend Engineer en SafeLabs.
A xornada tamén contou cunha mesa redonda sobre "Experiencia profesional das persoas egresadas do MUniCS", moderada por Rubén Pérez Jove. Nela participaron Pedro Blanco Casal (Indra Group), Pedro Fernández-Arruti Gallego (Tarlogic), Diego Pérez Cordeiro (Technica Engineering Spain), Rosa Seoane (Abanca) e Javier Suárez de Vivero (Plexus), quen compartiron as súas traxectorias profesionais en ciberseguridade.
A competición principal, en formato Capture The Flag (CTF), constou de máis de trinta retos durante catro horas, abordando áreas como aplicacións web, redes, criptografía, análise forense e enxeñaría inversa. Como novidade, introducíronse retos físicos de lockpicking e o uso de tarxetas NFC, ademais de probas de intelixencia artificial e criptografía cuántica.
“"O primeiro premio, dotado con 1200 euros, recaeu no equipo Tr0y4n1z4d0s, integrado por Eloy Sastre Sobrino, Pablo Diz de la Cruz e Daniel Pérez Mosquera. O segundo posto, cun premio de 900 euros, foi para CaB, formado por Martín González Dios, Sabela Pérez Quintana e Asier Cabo Lodeiro. O terceiro premio, de 600 euros, correspondeulle a We Buy Ducks, composto por Jan Duinkerken Rodríguez, Xabier Iglesias Pérez e Jesús Ferreira Rodríguez."
A organización conxunta entre a UDC e a UVigo, co apoio da Cátedra R en Ciberseguridade, contou coa colaboración de diversas facultades e grupos de investigación. Os retos foron desenvolvidos por persoal investigador vinculado aos másteres de Ciberseguridade e Enxeñaría de Telecomunicación.
