A Biblioteca Central acolle desde esta semana e ata o próximo xoves 15 de outubro a exposición ‘Oceánicas, pioneiras de la oceanografía’. Esta mostra itinerante, organizada polo Instituto Español de Oceanografía (IEO) e a FECYT, percorre a historia de vinte mulleres científicas vinculadas ao estudo dos océanos. É a primeira dunha serie de iniciativas que visibilizarán o papel feminino no mundo mariño desde diferentes perspectivas.
A través de doce paneis, ‘Oceánicas’ recupera as traxectorias de científicas que contribuíron ao coñecemento dos océanos, moitas veces en segundo plano fronte aos seus colegas homes. Entre elas atópanse Jeanne Baret, a primeira muller en dar a volta ao mundo no século XVIII; Marie Tharp, xeóloga mariña que creou o primeiro mapa dos fondos oceánicos do Atlántico; a galega Ángeles Alvariño, oceanógrafa do IEO que descubriu 22 novas especies mariñas; e investigadoras actuais como Ana Ramos, cuxa actividade permitiu descubrir máis de medio cento de novas especies e contribuíu á conservación dos ecosistemas fronte ao cambio climático.
A exposición complétase cunha selección bibliográfica da Biblioteca Universitaria relacionada coas protagonistas e os seus ámbitos de estudo, accesible a través do buscador Perseo. Tamén se presenta un novo número do Boletín Impacto, dedicado á produción científica en oceanografía das investigadoras da UVigo, que analiza o período 2016-2025.
Ademais, inclúese unha pequena mostra de instrumentos antigos de oceanografía química e exemplares de organismos mariños, como moluscos e ourizos, para ofrecer unha aproximación visual ás ferramentas e materiais da investigación oceanográfica.
Tras a súa estadía na Biblioteca Central, a mostra ‘Oceánicas’ trasladarase ao edificio de Ciencias Experimentais, onde poderá visitarse do 19 ao 31 de outubro.
Posteriormente, a Biblioteca Central acollerá ‘As outras mulleres do mar’, unha segunda exposición que renderá homenaxe ás mulleres cuxo traballo é fundamental para a economía e a cultura marítima galegas. Reunirá bibliografía e fotografías de Mar Caldas, profesora da Facultade de Belas Artes, sobre a presenza feminina na pesca, o marisqueo e a industria conserveira.
O proxecto ‘Un Mar de mulleres’ conta coa colaboración do Instituto Español de Oceanografía e os decanatos das facultades de Ciencias do Mar, Bioloxía e Química. Está prevista tamén unha charla coa científica Ana Ramos nunha data aínda por determinar.
