A Escola de Enxeñaría de Minas e Enerxía da Universidade de Vigo organiza a IV edición da xornada "Falamos de futuro? Un encontro próximo con profesionais do sector", que se celebrará este xoves, 1 de outubro, no Mercado do Progreso de Vigo. O evento, que comezará ás 18.30 horas, busca responder ás preguntas do alumnado sobre o futuro profesional tras finalizar os estudos.
A iniciativa, que se traslada por primeira vez ao Urban Market, no Mercado do Progreso, mantén o espírito das edicións anteriores: achegar o mundo profesional ao alumnado a través de traxectorias contadas en primeira persoa. A proposta xorde da necesidade de abordar a pregunta "e agora que?" cando se aproxima o final dun grao ou mestrado.
Tres egresados da escola compartirán as súas experiencias laborais en eidos como a transición enerxética, a consultaría e a investigación internacional. Tras a apertura polo director da escola, Santiago Pozo, intervirá Noelia Alonso Rodríguez, enxeñeira en Enerxía e consultora en eficiencia enerxética en Octopus Energy. Continuará Guillermo Rial Barreiro, senior project leader no Kaizen Institute, quen falará da súa experiencia en consultaría e xestión de proxectos internacionais.
O bloque de intervencións pecharase con Maria Mavroudi, enxeñeira de Minas que realiza a súa tese de doutoramento na Montanuniversität Leoben (Austria). Mavroudi presentará a súa investigación sobre observación da Terra e análise de datos aplicadas ao sector mineiro, enmarcada no proxecto europeo S34I.
A xornada culminará cunha mesa redonda e quenda de preguntas a partir das 20.10 horas, coa participación das tres relatoras e outros egresados. O obxectivo é debater sobre a incorporación ao mercado laboral, o desenvolvemento profesional e cuestións prácticas que xorden ao rematar os estudos.
A asistencia é libre e gratuíta, dirixida ao alumnado dos graos e mestrados da Escola de Enxeñaría de Minas e Enerxía, así como a persoal docente, investigador e calquera persoa interesada nas saídas profesionais destes ámbitos.
