Baixo o lema “crea o teu futuro dixital con WordPress nunha mañá”, o evento permitiu ao estudantado afondar no manexo desta ferramenta de código aberto, nacida hai dous anos nunha universidade da India e promovida pola comunidade global de WordPress. A xornada incluíu relatorios sobre as aplicacións da intelixencia artificial no deseño web e o uso de métricas para optimizar páxinas, ademais dun taller de iniciación.
A inauguración contou coa presenza da vicerreitora do campus, Marián Fernández, e do vicerreitor de Docencia e Transformación Educativa, Xabier Martínez Rolán, quen destacou a importancia de “reivindicar o software libre” e animou ao alumnado a atopar en WordPress “un aliado” profesional. Tamén participaron o coordinador do Máster en Comunicación en Medios Sociais e Creación de Contidos Dixitais, Javier Abuín, e o desenvolvedor web Juan Hernando.
Juan Hernando, co-organizador e representante de Weglot, lembrou a colaboración da comunidade local de WordPress coa Universidade desde 2018, que impulsou eventos como a WordCamp Galicia e o primeiro WordPress Campus Connect na comunidade. Sinalou que WordPress “impulsa máis do 40% dos sitios web do mundo” e presentou as oportunidades profesionais que ofrece.
A deseñadora de negocio dixital Ana Cirujano abriu a xornada cun relatorio sobre como a intelixencia artificial pode axudar no deseño web, na ordenación de contidos e na mellora da mensaxe, sen delegar o deseño completo para evitar resultados xenéricos.
Posteriormente, o enxeñeiro de software en Automattic, Javier Tiniaco, centrou a súa intervención no uso de métricas para tomar decisións “mellor fundamentadas, usando datos” sobre o comportamento dos usuarios.
A xornada completouse cun taller práctico, “Crea a túa web en WordPress desde cero”, impartido polo desenvolvedor de software en Automattic Javier Amieiro, quen guiou ao alumnado na configuración dun sitio web, elección de deseño, incorporación de contidos e manexo das ferramentas básicas do editor.
