A publicación, titulada '[La perspectiva de género en la intervención psico-socio-jurídica](https://www.aranzadilaley.es/tienda/la-perspectiva-de-genero-en-la-intervencion-psicosociojuridica?srsltid=AfmBOopup3lmLSTco3vdiBJgP3JA318Q7AdWIKcXXpXi2d_lFi1dhi7h)', foi realizada por membros do Grupo de Estudos en Traballo Social: Investigación e Transferencia (GETS-IT) da Universidade de Vigo, baixo a coordinación de Carmen Verde, Sabela Pérez e Iria Vázquez.
O libro sinala que gran parte do coñecemento nos ámbitos xurídico e social construíuse historicamente dende a perspectiva do grupo social dominante, o masculino. Isto xerou unha 'cegueira' na análise da realidade social das mulleres, que a miúdo son vistas de forma desigual ou minusvaloradas en comparación cos homes, desenvolvendo as disciplinas sociais e xurídicas baixo un marcado rumbo androcéntrico.
A obra ofrece unha síntese histórica do movemento feminista e da loita das mulleres polos seus dereitos, enlazando co estudo dos principais fitos normativos a nivel internacional e, especialmente, en España dende o século XVIII. O persoal investigador examina a evolución dos dereitos das mulleres, a institucionalización da resposta fronte á violencia de xénero e as súas limitacións estruturais.
Aborda tamén cuestións como as cargas de coidados, a reprodución social, a desigualdade material, as emocións e a autoestima no proceso xudicial, e a análise feminista das migracións. A publicación preséntase como un instrumento introductorio para incorporar a perspectiva de xénero á análise xurídica e á práctica forense.
As coordinadoras destacan que o libro está destinado a profesionais e estudantes do eido xurídico social (dereito, traballo social, criminoloxía, educación social, socioloxía, psicoloxía). Redactado cunha linguaxe accesible sen perder rigorosidade, a súa utilidade principal é ser un instrumento áxil de introdución ao feminismo e á implementación da perspectiva de xénero no ámbito xurídico, psicolóxico e social. Tamén destaca a interdisciplinariedade na abordaxe de problemáticas onde profesionais diversos afrontan conxuntamente investigacións e intervencións dende esta perspectiva.
