A organización Global Sumud Galicia confirmou a retención de varios integrantes da misión por parte de forzas israelís, denunciando que a operación se produciu en augas internacionais. Os organizadores cualifican a intervención de "acto de piratería" e "secuestro", argumentando que vulnera o dereito marítimo internacional e a liberdade de navegación.
Segundo o comunicado da plataforma, a flotilla foi interceptada a unhas 250 millas náuticas, fóra das xurisdicións israelís. Este feito súmase ás dificultades xa denunciadas por outro convoy terrestre da mesma organización que se dirixía a Rafah.
A nosa actuación supón unha vulneración da liberdade de navegación e de convenios internacionais vinculados ao dereito marítimo.
Ademais de Xurxo Porritt, vinculado a movementos sociais e de defensa da sanidade pública, a organización identifica outros cinco participantes galegos: Alberte Pagán Vázquez, Ana Fuentes Rey (de Porriño), Andrea Morales Ramos, Benito González Rodríguez (de Cangas) e Duarte Ferrín Iglesias.
Tras coñecerse a noticia, colectivos de apoio convocaron mobilizacións en varios puntos de Galicia. En Vigo, está prevista unha concentración para este martes ás 20:00 horas na Oliveira do Paseo de Alfonso, sumándose a protestas anunciadas noutras cidades como A Coruña, Santiago, Pontevedra, Lugo, Ferrol ou Redondela.
