As intervencións contra o furtivismo, desenvolvidas nos días previos á reapertura da campaña do polbo, saldáronse coa incautación de 267 quilos de polbo e 561 artefactos antirregulamentarios. As actuacións tiveron lugar na ría de Arousa e na zona da Guarda, segundo informou a Consellería do Mar.
Na Costa da Guarda, os efectivos decomisaron 450 artefactos que contiñan 175 quilos de polbo, os cales foron devoltos ao mar. Na ría de Arousa, realizáronse nove actas, seis de incautación e tres por suposta infracción, froito dun despregamento coordinado entre a Unidade Operativa de Vilaxoán e os Servizos Centrais.
Na zona de Defragueiras e Negreiriñas, o persoal de Vilaxoán incautou 51 artefactos e 48 quilos de polbo. En Taragoña e As Negreiras, retiráronse 28 nasas para voitirón, 40 artefactos, seis quilos de polbo e seis de choco. Na Mesa de Con, localizouse e retirou unha cacea con 20 nasas sen identificar que contiña sete quilos de polbo e dous de nécora.
A Unidade Operativa de Servizos Centrais interveu nas zonas intermareais e na canle de Pedregoso e Pedra da Loba, incautando 12 nasas para polbo, 60 para camarón e 25,1 quilos de polbo. Ademais, en Pedras Negras, retiráronse 20 artefactos con 7,4 quilos de capturas, tamén devoltas ao mar.
En Vigo, a Unidade Operativa levantou unha acta de incautación nas inmediacións de Cabo Silleiro, retirando 33 pezas de redes de enmalle ilegais que contiñan tres quilos de rodaballo, dous de raia e un de centola, especies reintroducidas no mar.
Finalmente, en Corrubedo, a Unidade Operativa de Portosín interveu 81 pezas de miños (4.500 metros), xunto con 15 quilos de raia, 25 de xuliana, sete de boi de mar e 0,5 de lagosta.
